Արևմտյան Աֆրիկայի երկրների ղեկավարները հավանություն են տվել սահմանադրական կարգը վերականգնելու նպատակով Նիգերում ռազմական շուտափույթ միջամտություն իրականացնելու որոշմանը։
ԱՄՆ պետքարտուղար Էնթոնի Բլինքենը հինգշաբթի օրը աջակցություն է հայտնել Արևմտյան Աֆրիկայի բլոկի ջանքերին՝ վերականգնելու օրինական իշխանությունը Նիգերում, զերծ մնալով ռազմական միջամտության մասին որոշմանն ուղղակի աջակցությունից, հայտնում է France Presse-ը:
Նիգերի հեղաշրջմանը ռուսական Վագներ խմբավորման մասնակցության մասին արդեն բացահայտ խոսվում է։ Հեղաշրջումն ուղղված էր Ֆրանսիայի դեմ։ Դա տեղի է ունեցել Ռուսաստան-Աֆրիկա վեհաժողովի ժամանակ։ Լավրովն ու Պուտինը կոչ էին արել հարգել սահմանադրական իրավունքը, իսկ Եվգենի Պրիգոժինն ասել էր, որ գոհ է հեղաշրջումից, քանի որ Նիգերի ժողովուրդը պայքարում է Ֆրանսիայից անկախանալու համար։ Թուրքիայի նախագահն իր հերթին հայտարարել է, թե Ֆրանսիան ստանում է Նիգերում իր գաղութատիրական քաղաքականության արդյունքը։
Ֆրանսիայի գործողությունները հանգիստ չեն տալիս Թուրքիային եւ Ռուսաստանին, այդ թվում՝ Փարիզի գործողությունները Հայաստանում։ Ֆրանսիան մի քանի անգամ նախաձեռնել է ՄԱԿ-ի Անվտանգության խորհրդում արցախյան հիմնախնդրի քննարկումներ, որոնք խափանվել են Ռուսաստանի կողմից։ Հիմա եկել է պահը, երբ Բերձորի միջանցքի հարցով պետք է նույնպես ՄԱԿ-ի Անվտանգության խորհրդին դիմել՝ նիստ հրավիրելու եւ բանաձեւ ընդունելու պահանջով։ Ֆրանսիան մնում է միակ երկիրը, որը կարող է դա անել։
Ֆրանսիայի դեմ Ռուսաստանի քայլերը կապված են Հայաստանում Ֆրանսիայի գործունեության հետ։ Իսկ Արեւմտաաֆրիկյան Միության՝ Ֆրանսիայի կողմից աջակցություն ստացած ռազմական միջամտության որոշումը կարող է նախադեպ դառնալ Բերձորի միջանցքի քաղաքական խնդրի լուծման համար։
Հայաստանի ղեկավարությունն ընտրել է խնդիրների «խաղաղ» լուծումը՝ «խաղաղության օրակարգի» տակ քողարկելով սահմանադրական պարտականությունների կատարումից հրաժարվելը և Հայաստանը վերացնելու ծրագրերի համակարգողի դերը։ Նիկոլ Փաշինյանն արդեն խոսում է պետությունը «պահպանելու» անհրաժեշտության մասին՝ ոչ միայն հրաժարվելով ժողովրդին ու տարածքը պաշտպանելու պարտականությունից, այլև չեզոքացնելով Հայաստանի գործընկերների հնարավոր գործողությունները։