Այն, ինչ տեղի է ունենում Հայաստանում, անսահման պոպուլիզմ է, որի հետևանքները երկար ժամանակ հետ կպահեն երկիրը զարգացումից. Ռոբերտ Քոչարյան

Սերժ Սարգսյանը չպետք է սահմանադրական բարեփոխում կատարեր:

Այս մասին ռուսական «НТВ» հեռուստաալիքին տված հարցազրույցում ասել է ՀՀ երկրորդ նախագահ, «Մարտի 1-ի» գործով մեղադրյալ Ռոբերտ Քոչարյանը՝ պատասխանելով լրագրողի հարցին, թե ինչու իր կարծիքով տեղի ունեցավ այս տարվա մայիսյան հեղափոխությունը, թե արդյոք դա երրորդ նախագահ Սերժ Սարգսյանի սխալների արդյունքն էր։

«Ես այն ժամանակ քննադատական ելույթով եմ հանդես եկել: Նա չպետք է փորձեր պահպանել իշխանությունը՝ նստելով վարչապետի աթոռին», — ասել է Քոչարյանը:

Անդրադառնալով Նիկոլ Փաշինյանի հայտարարությանը, որ ինքը գործնականում հնարավորություն չունի քաղաքականություն վերադառնալու, Քոչարյանը ևս մեկ անգամ շեշտել է, որ արդեն վերադարձել է. «Ես չեմ հայտարարել, որ պատրաստվում եմ վերադառնալ, ես ասել եմ, որ արդեն վերադարձել եմ»:

«Ես Հայաստանի նախագահն եմ եղել 10 տարի, այդ ընթացքում ՀՆԱ-ն աճել է ռեկորդային 5 անգամ, իսկ բյուջեն՝ 8 անգամ», — նշել է ՀՀ երկրորդ նախագահը՝ նկատելով, որ Երևանում կառուցված բոլոր հետաքրքիր շինություններն ստեղծվել են այդ տարիներին: Քոչարյանի խոսքով՝ իրենք տարեկան 35-40 հազար աշխատատեղ են ստեղծել:

«Փոքր և միջին բիզնեսի մասնաբաժինն իմ նախագահության սկզբում աճել է 15- 46 տոկոսով, մասնավոր հատվածի ՀՆԱ-ի մասնաբաժինը հասել է 80 տոկոսի: Կյանքի որակը փոխվել է արմատական կերպով», — հիշեցրել է Քոչարյանը և վստահություն հայտնել, որ հենց այն մարդիկ, որոնք այդ ընթացքում բիզնեսներ են ստեղծել, կդառնան այն ընտրական բազան, որի կարիքն ինքն ունի:

Լրագրողը հետաքրքրվել է, թե արդյոք իր կուսակցությամբ է մտադիր Քոչարյանն ասպարեզ դուրս գալ, թե կոալիցիայով: Որպես պատասխան վերջինս ասել է, որ այդ հարցը դեռ բաց է: Նա նշել է, որ կարող է ուժեղ համախմբող ուժ դառնալ նրանց համար, ովքեր տեսնում են այսօրվա խնդիրները:

Քոչարյանն անդրադարձել է նաև Նիկոլ Փաշինյանի՝ վերջին հանրահավաքի ժամանակ հնչեցրած հայտարարությանը, որի համաձայն՝ «Հայաստանում դե ֆակտո կառավարման նոր համակարգ է ստեղծվել»: Քոչարյանի խոսքով՝ «հեղափոխական հրապարակը հայտարարվել է իշխանության բարձրագույն մարմին»:

«Մեր սահմանադրության մեջ այդպիսի բան չկա, որ հրապարակը դառնա ժողովրդական իշխանության բարձրագույն մարմին»,– ասել է երկրորդ նախագահը:

«Այն, ինչ տեղի է ունենում Հայաստանում, անսահման պոպուլիզմ է, որի հետևանքները երկար ժամանակ հետ կպահեն երկիրը զարգացումից»: Քոչարյանը հրապարակում ներքին քաղաքական և տնտեսական հարցեր քննարկելն անվանել է ոչ միայն փորձի բացակայության, այլև ամբողջական անհասկացողության հետևանք, թե ինչ է իրենից ներկայացնում պետության կառավարումը, թե ինչ է գործադիր և օրենսդիր կառավարությունը, փոխհամագործակցությունը դրանց միջև:

Երկրորդ նախագահը, նկատելով, որ ոչ մի երկրում հեղափոխությունից հետո մարդկանց կյանքը չի բարելավվել, հիշատակել է Եգիպտոսի, Թունիսի, Սիրիայի, Լիբիայի, Ուկրաինայի, Վրաստանի օրինակները, որտեղ, նրա խոսքով, մարդկանց կյանքը վատթարացել է, տարածքի կորուստ է գրանցվել: «Պատճառ չեմ տեսնում, թե ինչու մեզ մոտ պետք է ավելի լավ լինի»,– նշել է նա:

Հարցազրույցի ավարտին Քոչարյանը հայտնել է, որ որոշել է վերադառնալ քաղաքականություն, քանի որ այսօր կան շատ մտահոգիչ հարցեր, որոնք էլ ստիպել են իրեն վերադառնալ:

Post Author: admin