Կենտրոնում 10-ից ավելի փոսեր ունենք, դրանցից յուրաքանչյուրի գինը 8-10 մլն դոլար է. Կենտրոնի թաղապետ

Lragir.am-ի հարցերին պատասխանել է Երևանի Կենտրոն վարչական շրջանի ղեկավար Վիկտոր Մնացականյանը

Պարոն Մնացականյան, մասնագետները տարիներ շարունակ բարձրացրել են Երևանի կենտրոնում կառուցապատումն արգելելու հարցը: Անգամ օրենսդրական նախաձեռնություն էր մշակվել տարիներ առաջ, որը այդպես էլ չընդունվեց Ազգային ժողովի կողմից: Ինչպե՞ս եք պատկերացնում այս խնդրի լուծումը:

Այո, փոքր կենտրոնի կառուցապատման մասին նման նախագիծ կար, բայց ես գտնում եմ, որ ընդհանրապես պետք է գոտիավորման մասին օրենքի նախագիծ մշակենք: Այսինքն՝ պետք է սահմանել, թե որ գոտիներում ինչ տիպի կառուցապատում պետք է լինի կամ չպետք է լինի: Օրինակ՝ մարդ մի տեղ դեղատուն է կառուցել, բերում են կողքը մեկն էլ են կառուցում, այդ մարդու գործը վատանում է: Եթե մենք գոտիավորման աշխատանք չտանենք, չկանոնակարգենք, թե այսինչ տարածքում ալկոհոլ վաճառող քանի սրճարան պետք է լինի և թույլ տանք, որ մի հարյուր հատ նման սրճարան լինի նույն տարածքում, պատկերացնո՞ւմ եք այդ տարածքի բնակիչների վիճակը:

Պետք է, օրինակ, սահմանվի, որ դպրոցից կոնկրետ ինչ հեռավորության վրա պետք է թույլատրվի ստրիպտիզ ակումբների կառուցումը: Քաղաքում իրար մոտ չպետք է լինեն այդքան բուքմեյքերական ակումբներ, այդ ամբողջը պետք է կանոնակարգվի: Երբևէ Երևանում նման կանոնակարգում չի եղել, և դա հնարավորություն է տվել, որ մարդիկ զարտուղի ճանապարհով կամ սուբյեկտիվ մոտեցումներով գործունեություն ծավալելու թույլտվություններ են ստացել: Մենք ուզում ենք, որ Երևանում սրճարաններն ավելանան, բայց ոչ այգիների հաշվին: Տեսեք, այսօր այգիներում ինչ է կատարվում: Որոնք թույլտվություն ունեն, կշարունակեն գործել: Օրինակ՝ Օղակաձև այգում շատ լավ սրճարաններ ունենք:

Այսինքն՝ ձեր ասածից կարելի՞ է ենթադրել, որ առաջիկայում Կենտրոնի վերաբերյալ գոտիավորման նախագիծ է ներկայացվելու Ազգային ժողովի հաստատմանը:

Այո, մենք հիմա մեր ավագանու անդամների հետ քննարկում ենք, պատգամավորների ու կառավարության հետ ևս համագործակցում ենք, թե որ մարմինը պետք է ներկայացնի գոտիավորման մասին օրենքի նախագիծը: Դա ամենաքաղաքակիրթ ձևն է քաղաքի կառուցապատման խնդիրները լուծելու համար: Կարևոր չէ, թե վաղը ով կլինի թաղապետ կամ քաղաքապետ, օրենքով պետք է շարժվել: Եթե մենք ասում ենք՝ քաղաքին տեր կա, դա նշանակում է, որ այս շենքին էլ տեր կա, մյուսներին էլ կա:

Իսկ փոքր կենտրոնում շինարարություն իրականացնելու, բարձրահարկ շենքեր կառուցելու թույլտվություններ տրվո՞ւմ են այս փուլում:

Հարցը շենք կառուցելու մեջ չէ, այլ շենք կառուցելու շնորհքի մեջ է: Ես գտնում եմ, որ Երևանի կենտրոնում 12 հարկանի շենքերից բարձր շենքեր չի կարելի կառուցել: Ես գտնում եմ, որ շենքերի խտությունն է շատ կարևոր, բայց այսօր Երևանում փոսեր ունենք, որոնք դեռ պետք է շենքերի վերածվեն: Այսօր մենք Կենտրոնում 10-ից ավելի փոսեր ունենք, դրանցից յուրաքանչյուրի գինը 8-10 մլն դոլար է: Միայն հողի ու փոսի գինն է այդքան:

Մարդը քանի՞ հարկ պետք է կառուցի, որ եկամուտ ունենա: Մենք առաջարկում ենք, որ գները իջեցնեն, քանի որ այդ գնով ձեռք բերողները պետք է գոնե 25 հարկանի շենք կառուցեն: Իսկ մենք թույլ չենք տալու, որ Երևանի կենտրոնում 25 հարկանի շենք կառուցեն: Կարող է այնպես ստացվի, որ այդ փոսերից որոշների վերաբերյալ շինարարությունն ընդհանրապես չթույլատրենք:

Մենք ունենք տեղեր, որ կարող ենք ասել՝ ավելի լավ է հինգ հարկանի թանկ շենքեր կառուցեն, մեկ քմ-ն 5000 դոլարով վաճառեն, քան թե կառուցեն 25 հարկ ու վաճառեն 1500 դոլարով: Բարձրահարկերի կառուցման դեմ բնակիչները բողոքում են, իսկ բնակիչների բողոքը շատ կարևոր է:

Մասնագիտական տարբեր դիտարկումների համաձայն՝ խիտ կառուցապատումը Երևանի կենտրոնում նաև սեյսմիկ ռիսկն է մեծացնում: Այս հարցը դիտարկե՞լ եք:

Եթե բարեխիղճ կառուցեն, վտանգ չկա: Այլ հարց է, որ մենք բարեխիղճ չենք օգտագործում մեր բազմաբնակարան շենքերի նկուղները, սյուները քանդել են ու տարածքները սարքել օբյեկտներ:

Իսկ ներդրողներն այսօր է՞լ են գայթակղված Երևանի կենտրոնում շինարարություն իրականացնելու գործով:

Մեզ շատ ներդրողներ են դիմում այսօր, բոլորն ուզում են շենք կառուցել Կենտրոնում, որովհետև դա արագ գերշահույթ ստանալու միջոց է:

Տեղացի ներդրողնե՞ր են, թե արտերկրից են գալիս:

Տեղացիներ էլ կան, բայց մեծամասնությունը դրսից են: Այս պահին մենք ներդրողներ ունենք Լիբանանից, Սիրիայից, ԱՄՆ-ից, Ռուսաստանից, Ֆրանսիայից, Կանադայից և Արաբական ծոցի երկրներից: Մենք ունենք 300 հազար դրամից մինչև 30 մլն դոլարի տարբեր ներդրումային ծրագրեր: Մարդիկ ասում են՝ տվեք մենք կառուցապատենք: Մենք Երևանի գլխավոր ճարտարապետ Արթուր Մեսչյանի հետ քննարկել ենք, ներրդրողների առաջ պայման ենք դրել, որ պետք է ստորգետնյա ավտոկայանատեղիներ էլ կառուցեն: Դա պահանջներից մեկն է:

Այսինքն՝ որոշ ներդրողների մերժո՞ւմ եք:

Մեծ մասին մերժում ենք եւ ուղղորդում այլ համայնքներ: Համայնքերը կլցվեն, հետո կգնանք մարզեր, և կտեսնեք, թե ինչ Հայաստան ենք ունենալու: