Ժամը 12:00 դրությամբ՝ Արցախից բռնի տեղահանված 100,483 անձ տեղափոխվել է Հայաստան: Այս մասին հոկտեմբերի 1-ին մամուլի ասուլիսի ժամանակ ասել է Հայաստանի վարչապետի մամուլի քարտուղար Նազելի Բաղդասարյանը։
Նրա խոսքով՝ այս պահի դրությամբ հաշվառում է անցել 84,408 անձ։ Հակարիի կամուրջը հատել է 21,079 տրանսպորտային միջոց։
Բաղդասարյանի խոսքով՝ տեղահանվածների մոտ 45%-ն (45,516 մարդ) օգտվել է պետության տրամադրած կեցավայրերից: Ըստ մարզերի բաշխվածությունը հետևյալն է՝ Արագածոտնում՝ 2262, Արարատում՝ 12,638, Արմավիրում՝ 3943, Գեղարքունիքում՝ 3516, Լոռիում՝ 2252, Կոտայքում՝ 11,132, Շիրակում՝ 2114, Սյունիքում՝ 3655, Վայոց Ձորում`1756, Տավուշում՝ 2129 մարդ: Սրանք այն մարդիկ են, որոնք օգտվել են պետության տրամադրած կեցավայրերից:
