Երևանի քաղաքապետարանը ապամոնտաժել է Ավետիսյան-Գյուլբեկյան խաչմերուկում գտնվող «ԱՐՄ ՊԵՏՐՈԼ» բենզալցակայանը։ Քաղաքաշինության, տեխնիկական և հրդեհային անվտանգության տեսչական մարմինը հրդեհատեխնիկական հետազոտություններ է իրականացրել բենզալցակայանում։
Հետազոտություններով արձանագրել է հրդեհային և տեխնիկական անվտանգության նորմատիվ փաստաթղթերի պահանջների այնպիսի խախտումներ, որոնք անմիջական սպառնալիք են մարդկանց կյանքի, առողջության և անվտանգության համար և կապարակնքել բենզալցակայանը։ Ընկերության սեփականատերը, սակայն, համամիտ չէ պետական կառույցի հետ, որի որոշումը բողոքարկել է դատարանում:
Դատարանն էլ վճռել է, որ բենզալցակայանն ապօրինի է կապարակնքվել։
«Վճիռ ունեմ, որ պետք է ընդհանրապես մոտիկ չգան բենզալցակայանին, մի պատկան մարմին չի էլ բողոքարկել դատարանի այս վճիռը, եթե դեմ էիք թող բողոքարկեին։ 30 տարի է՝ այս բենզալցակայանը գործում է, ոչ մի խնդիր չի եղել, հանրային շահի հետ կապված ոչ մի խնդիր չի եղել։ 30 տարի է՝ բոլոր տեսչական մարմինները դրական եզրակացություն են տվել։
Գործը դեռ դատարանում է՝ մինչև գործի ավարտը չեն կարող քանդել բենզալցակայանը։ Չի կարող 30 տարվա բենզալցակայաննն ապամոնտաժվել, իմ ընտանիքի հացի խնդիրը լուծում եմ այս բենզալցակայանի միջոցով»,- հայտարարեց բենզալցակայանի տնօրեն Արայիկ Անդրեասյանը։
Նա նաև նշեց, որ առանց իրեն ծանուցելու են հիմա փորձում բենզալցակայանն ապամոնտաժել։
Նշենք, որ Երևանի քաղաքապետի որոշմամբ՝ չի օրինականացվել Արաբկիր վարչական շրջանի Ավետ Ավետիսյան և Գյուլբենկյան փողոցների խաչմերուկում, առանց հողօգտագործման իրավունքի պետական գրանցման օգտագործվող, համայնքային սեփականություն հանդիսացող հողամասում կառուցված ինքնակամ կառույցը, հետևաբար, այն քանդելու որոշում կա։