Հայաստանում երկրորդ անգամ անցկացվում է լավագույն գործատուների Career City Fest-ը՝ Կարիերայի քաղաք փառատոնը, որտեղ ներկայացված ավելի քան հարյուր կազմակերպության նպատակը մեկն է՝ ստեղծել հայկական աշխատաշուկայի այնպիսի մշակույթ, որը կլինի գրավիչ, ստեղծարար և կապահովի մասնագիտական աճ, իսկ լավագույն կարիերայի փնտրտուքի մեջ գտնվող այցելուները կկարողանան այստեղից հեռանալ խանդավառված՝ նոր աշխատանքի հեռանկարով:
Կարիերայի քաղաքը քաղաքապետ էլ ունի. «Այբ» հիմնադրամի հոգաբարձուների խորհրդի նախագահ Արամ Փախչանյանն է: Նրա համոզմամբ՝ Career City-ին Հայաստանի ամենագլխավոր քաղաքն է, քանի որ հենց այդտեղից է կախված, թե ինչպես է ապրելու և զարգանալու երկրի տնտեսությունը:
Career City Fest-ի գլխավոր գործընկեր «Դիջիթեյն գրուպ»-ը ստեղծել է «Սերունդների ձայնը» կրեատիվ հարթակ, որտեղ այցելուները գործատուներին հրապարակավ ներկայացնում են, թե ինչն է իրենց համար ավելի կարևոր. օրինակ՝ մասնագիտական առաջընթա՞ցը, թե՞ աշխատավարձի չափը:
Skill-Event Marketing Company-ի հիմնադիր Սերգեյ Ուսնունցը, որը նաև Career City Fest-ի հիմնադիրն է, գրանցված ցուցանիշի հանդեպ իր գոհունակությունն է հայտնել՝ տեսնելով այցելուների մեծաթիվ քանակն ու ոգևորությունը: Իրենք տվել են յուրօրինակ հարթակ, որտեղ գործատուն հանդիպում է իր ապագա աշխատակիցներին և փորձում գրավել նրանց, իսկ ապագա աշխատակիցն իր հերթին գործատու ընտրելու լայն հնարավորություն է ստանում՝ միևնույն ժամանակ մասնակցելով վարպետության դասերի, սեմինարների՝ շփման փորձ և ճիշտ ներկայանալու հմտություն ձեռք բերում:
Աշխատանքի ցուցահանդեսը կարիերայի քաղաքում բաց կլինի նաև ապրիլի 28-ին: Նրանք, ովքեր չեն կարողանա ներկա գտնվել, ապա հետևելով ինֆորմացիոն գործընկեր Tert.am-ի կայքէջին և սոցցանցերին՝ կծանոթանան Career City Fest-ի անցուդարձին՝ այնտեղ տեղադրված տաղավարում իրականացված հատուկ հարցազրույցների և հետաքրքիր հյուրերի միջոցով: