Ադրբեջանի իշխանությունները նոր դատական ֆարս են նախաձեռնել։ Այս անգամ մեղադրյալ է Լեռնային Ղարաբաղից բանտարկյալ Ռաշիդ Բեգլարյանը։
Ինչպես հաղորդում է ԱՊԱ-ն, այսօր Սաբունչիի շրջանային դատարանում Ֆիզուլիի ռազմական դատարանի դատավոր Ալի Սուլեյմանովի նախագահությամբ տեղի ունեցած խորհրդակցության ժամանակ հրապարակվել են հետաքննության փաստաթղթերը։
«Քննության ընթացքում Բեգլարյանի վերաբերյալ հետաքրքիր փաստեր են բացահայտվել։ Պարզվել է, որ նրա հաշվեհամարներին Ֆրանսիայից փոխանցվել է մոտ 2 մլն եվրո։ Իր՝ Բեգլարյանի խոսքով, Ֆրանսիայում ապրող որոշ մարդիկ այս գումարը նվիրաբերել են մինչ ձերբակալությունն իրեն օգնելու համար։ «Ինձ միայն փաստաթղթեր են ուղարկել։ Իբր նվիրատվություն էին անելու»,- ասաց մեղադրյալը։ Այնուհետև դատարանում Բեգլարյանը ցուցմունք է տվել նախաքննությանը»,- հայտնում է հրատարակությունը։
Բեգլարյանը գերեվարվել է անցած ամառ։ Ադրբեջանի պետական անվտանգության ծառայությունը Ռաշիդ Բեգլարյանին դասել է հենց ադրբեջանցիների կողմից իրականացված և հայկական կողմին վերագրվող «Խոջալուի ցեղասպանության» մասնակիցների թվում։
Ադրբեջանական լրատվամիջոցների կողմից ավելի վաղ հրապարակված հայտարարության մեջ Պետական անվտանգության ծառայությունը նշել է, որ «Ադրբեջանի ռազմագերիների և միջազգային մարդասիրական իրավունքով պաշտպանված այլ անձանց խոշտանգումների, ինչպես նաև խաղաղության և մարդկության դեմ ուղղված այլ ծանր հանցագործությունների, ռազմական հանցագործությունների, ապօրինի հայկական զինված խմբավորումների գործունեությանը մասնակցության մեջ կասկածվող Ռաշիդ Արամայիսի Բեգլարյանը ձերբակալվել է ԱդրբեջանիՀանրապետություն քրեական օրենսգրքի 112, 113, 115.2, 279.1 և 318.1 հոդվածներով»։
