Այս հանդիպումը ևս մեկ օրինակ է երկու երկրների բարձր մակարդակով երկխոսության, որը նոր խթան կհաղորդի Հայաստանի ու ԱՄՆ-ի միջև զարգացող գործընկերությանը։ Այս մասին Հայաստան-ԱՄՆ ռազմավարական երկխոսության ամփոփիչ նիստին ունեցած ելույթում ասաց ԱԳ նախարար Արարատ Միրզոյանը։
«Ժողովրդավարական սկզբունքների նկատմամբ մեր ամուր հանձնառությունը մեր գործընկերության առանցքում է՝ չնայած այն հագամանքին, որ ժողովրդավարությունը վտանգված է ամբողջ աշխարհում, այդ թվում՝ մեր տարածաշրջանում։ Չնայած մարտահրավերներին, առաջացող հիբրիդային անվտանգության սպառնալիքներին՝ Հայաստանի կառավարութունը վճռական է հետևել իր ժողովրդի կատարած ժողովրդավարական ընտրությանը, ապահովել օրենքի գերակայությունը և մարդու իրավունքների պաշտպանությունը։ Ես հավատացած եմ, որ մեր համախոհ գործընկերները, մասնավորապես ԱՄՆ-ն, լիովին աջակցում են ու կանգնած են մեր կողքին՝ ապացուցելու, որ ժողովրդավարությունը կարող է արդյունքներ ապահովել»,- ասաց նա։
Միրզոյանն ընդգծեց, որ անհրաժեշտ է խորացնել բազմաոլորտ ու տարբեր ուղղություններ ընդգրկող համագործակցությունը։
«Մեր երկկողմ օրակարգը շարունակում է ընդլայնվել ու ներառել Հայաստանի դիմակայունության ու զարգացման համար կարևոր ուղղությունները։ Հայաստանը հավատարիմ է Ադրբեջանի հետ հարաբերությունների կարգավորման ու սահմանների սահմանազատման գործընթացին՝ հիմնված 1991 թվականի Ալմա Աթայի հռչակագրի հիմքով տարածքային ամբողջականության փոխադարձ ճանաչման վրա»,- ասաց նախարարը։
Միրզոյանի խոսքով այսօրվա օրակարգով քննարկում են քայլերի ու ծրագրերի կոնկրետ շրջանակ՝ տնտեսության ու էներգետիկ ոլորտի դիվեսիֆիկացիայից մինչև պաշտպանական ոլորտի համագործակցություն ու արդարադատության ոլորտի բարեփոխումներ։
«Հուսով ենք, որ ԱՄՆ-ի հետ մեր ռազմավարական երկխոսությունը կբարձրացնենք նոր ռազմավարական հանձնաժողովի մակարդակի»,- ընդգծեց Արարատ Միրզոյանը։
