Ռուսաստանի հետ տնտեսական համագործակցության զարգացումը համապատասխանում է Բուդապեշտի շահերին։
Այս մասին հայտարարել է Հունգարիայի արտգործնախարար Պետեր Սիյարտոն՝ ամփոփելով ռուս-հունգարական միջկառավարական հանձնաժողովի նիստի արդյունքները, փոխանցում է ՌԻԱ Նովոստին։
«Կարող եմ ասել, որ առանց հունգարա-ռուսական համագործակցության հունգարական տնտեսությունը որոշ ոլորտներում չէր կարող անվտանգ աշխատել»,-ասել է Սիյարտոն։
Նրա խոսքով՝ մի շարք ոլորտներում ևս զգալի ներուժ կա Ռուսաստանի և Հունգարիայի համագործակցության համար:
«Ինչպես Հունգարիայի, այնպես էլ Ռուսաստանի ազգային շահերից է բխում զարգացնել համագործակցությունը պատժամիջոցներից չազդված ոլորտներում, ինչպիսիք են էներգետիկան, բժշկությունը, գյուղատնտեսությունը, գիտությունն ու կրթությունը»,-ասել է Սիյարտոն։
Հունգարիայի ԱԳ նախարարը նաև ընդգծել է՝ այն ժամանակ, երբ եվրոպական շատ երկրներ շարունակում են գաղտնի բիզնես վարել Ռուսաստանի հետ, Բուդապեշտը դա անում է բացահայտ:
