Իսրայելի վարչապետ Բենիամին Նեթանյահուն չի արձագանքել Լիբանանում ժամանակավոր հրադադարի մասին ԱՄՆ-ի և Ֆրանսիայի կոչերին։ Այս մասին ասվում է Իսրայելի կառավարության ղեկավարի գրասենյակի հաղորդագրության մեջ։
Ըստ հայտարարության՝ վարչապետը հրամայել է իսրայելական բանակին «գործել ամբողջ ուժով» լիբանանյան «Հըզբոլլահ» շարժման դեմ։
«Զինադադարի մասին տեղեկությունները չեն համապատասխանում իրականությանը։ Խոսքը ամերիկաֆրանսիական առաջարկի մասին է, որին վարչապետն անգամ չպատասխանեց։ Հյուսիսում ռազմական գործողությունները մեղմելու ենթադրյալ հրամանի մասին հաղորդագրությունը նույնպես չի համապատասխանում իրականությանը»,- պարզաբանել է Նեթանյահուի գրասենյակը։
Հայտարարության մեջ ընդգծվում է, որ մարտերը Գազայի հատվածում նույնպես կշարունակվեն՝ «մինչ իրագործվեն պատերազմական բոլոր նպատակները»։
