Որևիցե ձևով կասկածի տակ դնել ՍԴ անաչառությունը տեղին չէ, որովհետև բազմաթիվ դեպքերի օրինակներ կարող եմ բերել, որ իշխանության կարծիքը, քաղաքական մթնոլորտը և ՍԴ որոշումը հակառակ պատկեր են ունեցել: Այս մասին խորհրդարանում լրագրողների հետ զրույցում ասաց ԱԺ նախագահ Ալեն Սիմոնյանը:
Հարցին՝ Ադրբեջանն այլևս պատճառներ չի՞ կարող ունենալ և ասել, որ ՀՀ Սահմանադրության մեջ կան տարածքային պահանջներ Ադրբեջանի նկատմամբ, Սիմոնյանն ասաց.
«Խաղաղության համաձայնագրի մեջ նշված է, որ այն ավելի վեր է լինելու, քան մյուս իրավական փաստաթղթերը, դա շատ անհիմն մեղադրանք է: Հակառակը՝ Ադրբեջանի Սահմանադրության մեջ կա դրույթ, որ տարածքային պահանջներ է ներկայացնում ոչ միայն Հայաստանի, այլ տարածաշրջանի մյուս երկրների նկատմամբ»,- ասաց նա:
Սիմոնյանն ընդգծեց՝ մեր քաղաքական կամքն է` խաղաղության պայմանագիր կնքել:
«Պետք է արձանագրեմ, որ Ադրբեջանի քաղաքական կամքի պարագայում, հենց այսօր էլ կարող ենք կնքել խաղաղության պայմանագիր։ Նույնիսկ այսօր մենք պատրաստ ենք ստորագրել համաձայնեցված կետերը, Հայաստանն ունի քաղաքական կամք», -նշեց Սիմոնյանը:
