Թայվանը համաձայնագրեր է ստորագրել ԱՄՆ կառավարության հետ մոտ հազար հարվածային անօդաչու թռչող սարքեր ձեռք բերելու հնարավորության վերաբերյալ՝ ՉԺՀ-ի բանակի հնարավոր գործողություններից պաշտպանվելու համար, հայտնում է Bloomberg-ը՝ հղում անելով ոլորտի անանուն աղբյուրներին։
«Թայվանի պաշտպանության նախարարությունը պաշտոնական համաձայնագրեր է ստորագրել ԱՄՆ կառավարության հետ, որոնք թույլ են տալիս գնել մինչև հազար հարվածային անօդաչու թռչող սարքեր AeroVironment և Anduril Industries ընկերություններից՝ Չինաստանի հնարավոր հարձակմանը դիմակայելու համար», – ասվում է գործակալության հոդվածում:
Ինչպես նշում է գործակալությունը, սեպտեմբերին կղզու իշխանությունները ստորագրել են «առաջարկներով և առաջարկների ընդունմամբ նամակ», իսկ մոտ ապագայում կողմերը կարող են կնքել պայմանագրեր, որոնցում կնշվեն անօդաչու թռչող սարքերի ճշգրիտ թիվը, դրանց արժեքը դոլարով և դրանց առաքման ժամկետները։ Պեկինը Թայվանը համարում է ՉԺՀ-ի անբաժանելի մասը, և «մեկ Չինաստան» սկզբունքին հավատարիմ մնալը նախապայման է այլ պետությունների համար, որոնք ցանկանում են դիվանագիտական հարաբերություններ հաստատել ՉԺՀ-ի հետ: ԱՄՆ–ն նույնպես հետևում է «Մեկ Չինաստան» սկզբունքին և չի ճանաչում Թայվանի անկախությունը, չնայած այն հանգամանքին, որ սերտ կապեր է պահպանում Թայբեյի հետ տարբեր ոլորտներում և զենք է մատակարարում կղզի։
