Եվրամիությունը պաշտոնապես հրապարակել է Չինաստանից էլեկտրամոբիլների ներկրման համար լրացուցիչ՝ մինչև 35,3 տոկոս մաքսատուրքեր սահմանելու մասին որոշումը, որն ուժի մեջ կմտնի հոկտեմբերի 30-ից, հայտնում է scmp.com-ը:
«Սույն կանոնակարգն ուժի մեջ է մտնում Եվրոպական միության պաշտոնական ամսագրում հրապարակման հաջորդող օրվանից: Դրա իրականացումը միանգամայն պարտադիր է և ուղղակիորեն կիրառելի բոլոր անդամ պետություններում»,- ասվում է փաստաթղթում։
Ինչպես նշվում է ԵՀ-ի մամուլի հաղորդագրության մեջ, BYD էլեկտրամոբիլների համար մաքսատուրքերը կկազմեն 17,0%, Geely-ն՝ 18,8%, SAIC-ը՝ 35,3%:
Չինաստանը համաձայն չէ չինական էլեկտրական մեքենաների համար լրացուցիչ մաքսատուրքեր սահմանելու Եվրամիության որոշման հետ և արդեն հայց է ներկայացրել Առևտրի համաշխարհային կազմակերպություն, չորեքշաբթի հայտնել է Չինաստանի առևտրի նախարարությունը։
«Չինաստանը համաձայն չէ և չի ընդունում այս որոշումը և, վեճերի լուծման մեխանիզմի շրջանակում, հայց է ներկայացրել ԱՀԿ», – ասվում է Առևտրի նախարարության հայտարարության մեջ:
Գերատեսչությունը նշել է, որ ԵՄ-ի հակասուբսիդավորման հետաքննությունը չինական էլեկտրական մեքենաների նկատմամբ ներկայացնում է պրոտեկցիոնիստական մոտեցում, որն իրականում «անբարեխիղճ մրցակցություն» է «ազնիվ մրցակցության» անվան տակ։
«Չինաստանը կշարունակի ձեռնարկել բոլոր անհրաժեշտ միջոցները՝ չինական ընկերությունների օրինական իրավունքները և շահերը վճռականորեն պաշտպանելու համար»,- ասվում է հայտարարության մեջ։
