Նախօրեին Shamshyan.com լրատվական կայքում հրապարակվել է «Արտակարգ դեպք՝ Երևանում․ «Արթմեդ» բժշկական կենտրոնում վիրահատության ժամանակ բժշկական տաքացնող սարքը բժիշկը դրել է 68-ամյա կնոջ վրա, ինչի հետևանքով վերջինը այրվածքներով տեղափոխվել է այլ հիվանդանոց» վերտառությամբ հրապարակում:
Արթմեդ ԲՎԿ-ից հայտնում են, որ 68 տարեկան բուժառուն ընդունվել է բժշկական կենտրոն՝ կոնստրուկցիաների հեռացման նպատակով, որոնք բուժառուի մարմնում տեղադրվել են շատ ավելի վաղ և այլ բժշկական կենտրոնում:
Փետրվարի 7-ին տեղի է ունեցել կոնստրուկցիաների հեռացումը և հետվիրահատական շրջանը անցել է հարթ՝ հետվիրահատական շրջանին բնորոշ բժշկական բոլոր ցուցումներին համապատասխան: Երեք օր ստանալով հետվիրահատական ստացիոնար, վերականգնողական բուժում ԲՎԿ-ի պրոֆեսիոնանալ բուժանձնակազմի կողմից, բուժառուն դուրս է գրվել հիվանդանոցից լավացումով արդեն ամբուլատոր հսկողության ցուցումով։
Նշենք, որ վիրահատության ընթացքում վիրահատող բժշկի կողմից օգտագործվում է էլեկտրական դանակ, որի վրա տեղադրվում է պասիվ էլեկտրոդ, ինչի կիրառման ընթացքում՝ յուղոտ կամ մազակալված մաշկի առկայության դեպքում կարող է առաջանալ նման այրվածք:
ԱՐԹՄԵԴ ԲՎԿ-ում բոլոր վիրահատություններից առաջ նախապես բուժանձնակազմի կողմից վիրահատարանի էլեկտրական գործիքները նախապես փորձարկվում են, բերվում են աշխատանքային վիճակի և դրանից հետո բուժառուին միայն տեղափոխում վիրահատարան: Այս դեպքը բացառություն չէ:
Հերթական այցի ժամանակ բուժառուն գանգատվել է սրունքի վերին երրորդական շրջանի ցավերից։ Զննման ժամանակ բուժող բժշկի կողմից նկատվել է ստորին վերջույթի շրջանում այրվածք, որի պատճառները բժշկին հայտնի չեն եղել: Չի արձանագրվել ինչպես նախավիրահատական, այնպես էլ հետվիրահատական փուլերում:
Այնուամենայնիվ, «ԱՐԹՄԵԴ»-ում իրականացվել է համապատասխան բուժօգնություն: Հետագա այցերի ժամանակ ի թիվս հիմնական ամբուլատոր բուժումների կատարվել է այրվածքի վիրակապում և այլ բուժումներ։
Այլ բժշկական կենտրոն բուժառուն դիմել է դուրսգրումից մոտ 20 օր հետո:
Մենք կոչ ենք անում հանրությանը միակողմանի կերպով չընկալել լրատվական կայքում տեղ գտած հրապարակումը, քանի որ նման միակողմանի հրապարակումները վնասում են «ԱՐԹՄԵԴ ԲՎԿ»-ի և բուժող բժիշկների բարի համբավը:
SHAMSHYAN.com-ի հրապարակմանն արձագանքել են «ԱՐԹՄԵԴ ԲՎԿ»-ից:
Ինչպես ավելի վաղ հայտնել էրֆոտոլրագրող Գագիկ Շամշյանը, փետրվարի 27-ին արտակարգ դեպք էր տեղի ունեցել Երևանում։ Ժամը 14։15-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Ավանի բաժնում տեղեկություն էր ստացվել, որ «ջերմային կոնտակտային այրվածք աջ ծնկափոսի շրջանում, 3-րդ Բ աստիճան՝ մոտ 0.3% մարմնի մակերես, 20 օր ուշացումով հետվիրահատական» ախտորոշմամբ «Այրվածքաբանության ազգային կենտրոն» բուժօգնության է դիմել մի քաղաքացի։
Օպերատիվորեն հիվանդանոց մեկնած ոստիկանության Ավանի բաժնի ծառայողները՝ բաժնի պետ Անդրանիկ Շահբազյանի գլխավորությամբ, պարզել էին, որ բուժօգնության տեղափոխվածը Երևանի բնակիչ 68-ամյա Լենա Շ․-ն է։
Գ․ Շամշյանի տեղեկություններով՝ տուժածը հայտնել էր, որ վնասվածքը ստացել էր փետրվարի 7-ին՝ «Արթմեդ» բժշկական վերականգնողական կենտրոնում օրթոպեդ-վնասվածքաբան Երևանի բնակիչ 36-ամյա Ռաֆայել Ա․-ի կողմից կատարված վիրահատության ժամանակ՝ բժշկական տաքացնող սարքը իր վրա դնելու հետևանքով:
Դեպքի փաստով ոստիկանության Ավանի բաժնում փաստաթղթեր էին կազմվել, որոնք փոխանցվել են ՀՀ Քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժին։
