Առաջին անգամ, երբ անձը վարորդական վկայականի իրավունք ստանալու քննությունից բացասական գնահատական է ստանում, թե՛ տեսական, թե՛ գործնական քննությունը, հաջորդ ամենասեղմ ժամկետը 1 շաբաթ անց վերահանձնելն է, բայց ունենք բազմաթիվ խնդրանքներ, դիմումներ քաղաքացիներից, որոնք պատրաստ են արագացված ծառայություններ ձեռք բերել, և դրա դիմաց ոչ թե 7 օր անց վերահանձնել քննությունը, այլ պայմանականորեն հաջորդ օրը, 3 կամ 4 օր հետո: Այդ մասին Կառավարության՝ մայիսի 15-ի նիստին ասաց ՆԳ նախարար Արփինե Սարգսյանը՝ ներկայացնելով ոլորտը կարգավորող հավելյալ հնարավորությունը:
«Ըստ այդմ՝ առաջարկում ենք 1-ին անգամ բացասական ստանալու դեպքում հաջորդ օրը քննությանը մասնակցելու համար սահմանել հավելյալ վճարով քննություն հանձնելու հնարավորություն: Այն կկազմի 45 հազար ՀՀ դրամ: Առաջին անգամ բացասական ստանալու դեպքում, եթե անձը ոչ թե հաջորդ օրը ցանկություն ունի [քննություն հանձնելու], այլ 3-րդ օրը, ապա այս դեպքում անձը կրկին՝ էքստրավճարի տրամաբանության մեջ, ևս 30 հազար դրամ վճարելու պայմանով, կարող է ավելի սեղմ ժամկետում հանձնել քննությունը:
Բայց ուզում եմ նորից շեշտել, որ սա հավելյալ հնարավորություն է մեր քաղաքացիների համար: Այսինքն՝ ստանդարտ ժամանակը, որը 7 օր անց վերահանձնում է, սա պահպանում ենք: Եթե անձը ցանկություն ունի և ունի հնարավորություն՝ հավելյալ վճարի դիմաց ստանալու հավելյալ ծառայություն, ապա այս դեպքում թողնում ենք այս հնարավորությունը»,- ասաց նա:
Կա նաև 2-րդ և յուրաքանչյուր հաջորդ անգամ բացասական գնահատականի դեպքում վերահանձնման հնարավորություն: Այս դեպքում օրենսդրությունը սահմանում է, որ ամենասեղմ ժամկետը 1 ամիս անց վերահանձնումն է:
«Այստեղ ևս սահամանել ենք ժամկետային որոշակի հնարավորություններ. երկրորդ և յուրաքանչյուր հաջորդ անգամ բացասական գնահատական ստանալու դեպքում 7-րդ օրը քննությանը մասնակցելու հնարավորություն, և յուրաքանչյուր հաջորդ անգամ՝ այս դեպքում արդեն 14-րդ օրը, քննության մասնակցելու հնարավորություն»,- ասաց նախարարը:
Որոշման նախագիծն ուժի մեջ կմտնի 2025 թվականի սեպտեմբերի 1-ից:
