Նոյեմբերի 13-ին Հայաստանի արտգործնախարար Արարատ Միրզոյանը մեկնում է Միացյալ Թագավորություն, որտեղ բացի իր գործընկերոջ հետ հանդիպումից, Արարատ Միրզոյանը կմասնակցի նաեւ Հայաստան-Բրիտանիա ռազմավարական երկխոսության առաջին նիստին: Հայ-բրիտանական երկխոսությունն անշուշտ նոր իրողություն չէ, եւ հարցը տվյալ պարագայում այն է, թե ինչ նոր որակ է ստանալու այդ երկխոսությունը, որը կպարունակի փոխշահավետ հեռանկար, նպաստելով Հայաստանի հանրապետության անվտանգությանն ու նաեւ արդիականացմանը՝ անվտանգության լայն, համալիր, համակարգթային տրամաբանության համատեքստում: Այստեղ իհարկե կարեւոր է հասկանալ, թե ռեգիոնում ինչ շահ է հետապնդում Բրիտանիան, որպեսզի շոշափելի լինի, թե Բրիտանիայի հետ ռազմավարական երկխոսության հանգամանքը ինչ տրամաբանություն է ենթադրելու Հայաստանի անվտանգության խնդիրների համատեքստում:Բրիտանիան ռազմավարական նշանակության ներդրումներ է արել Ադրբեջանում: Հետխորհրդային շրջանում այդ ներդրումները չափվում են տասնյակ եւ նույնիսկ հարյուրն անցնող միլիարդ դոլարներով, որոնք բնականաբար գերազանցապես ուղղվել են Ադրբեջանի նավթագազային, էներգետիկ ոլորտ: Ըստ այդմ, հնարավոր է ուրվագծել «երկսայր» մի հանգամանք: Մի կողմից Ադրբեջանը Բրիտանիայի համար ունի մեծ նշանակություն եւ հետեւաբար Բրիտանիան չի կարող Հայաստանի հետ հարաբերություն կառուցել Ադրբեջանի հետ հակադրվելու որեւէ ռիսկով, մյուս կողմից Բաքվի հանդեպ տնտեսական մեզ ազդեցությունն իհարկե Բրիտանիային դարձնում է ռեգիոնալ ազդեցիկ դերակատար, որն անշուշտ քաղաքական մեծ կշիռ կարող է ունենալ ռեգիոնալ անվտանգության մթնոլորտի ձեւավորման գործում:
Արցախի պատգամավորները սպասում են Օսկանյանի հետ հանդիպմանը
03.05.2024
04:53
