Հայաստանին հարկավոր է գոնե առաջնային 100 -150 հազար աշխատատեղ, որ կարողանանք գործազրկությունն ու արտագաղթը կանխել. Ա.Ադիբեկյան

Կմեկնեիք Հայաստանից այլ վայրում մշտապես բնակվելու՝ 2017 թվականին Հայաստանի բնակիչների 33 տոկոսը այս հարցին դրական պատասխան է տվել:

Այս մասին են վկայում հետազոտական ռեսուրսների կովկասյան կենտրոնի անցկացված հարցման արդյունքները, որոնք արտացոլված են «Կովկասյան Բարոմետր 2017» զեկույցում:

Հարցվածների 65 տոկոսը պատասխանել է, որ մշտապես չէր մեկնի, իսկ 2 տոկոսը դժվարացել է պատասխանել:

2017 թվականը արտագաղթի տեմպերի տեսանկյունից ամփոփելիս սոցիոլոգ Ահարոն Ադիբեկյանը Tert.am-ի հետ զրույցում նկատեց, որ դա ընդհանուր ցավ է և վերաբերվում է բոլոր խավերին: Սոցիոլոգի խոսքով վիճակն այն է, որ Հայաստանի բնակչության 30 տոկոսը հենց հիմա էլ կարող  է գնալ, եթե հնարավորություն ունենա:

«Մոտ կեսը` 45 տոկոսը  արտագաղթելու տրամադրություն ունի, մնացածը `25 -30 տոկոսը մնում է հայրենասեր ու մտադիր է ապրել Հայաստանում: Այլ բան է,  որ ուսանողների զգալի մասը`75 տոկոսը, այստեղ իր ապագան չի տեսնում, որովհետև մենք տեխնիկական ուսումնարաններ չունենք, աշխատատեղեր չունենք»-ասաց Ադիբեկյանը:

Նա նշեց, որ Հայաստանում 1000 գործարան փակվեց, 300 տնտեսական ձեռնարկություն, կոլխոզները լուծարվեցին, ինչի հետևանքով մեծ թվով մարդիկ, ըստ Ադիբեկյանի, կորցրին աշխատանք:

«Արդեն այն ժամանակ  մեկ միլիոն մարդ արտագաղթեց, որ կարողանա իրեն, իր ընտանիքը պահի, աշխատի: Հիմա մենք դարձել ենք ագրոարտադրող, վերամշակող, մի քիչ ինովացիոն, տեղեկատվական: Գիտությունը մահամերձ վիճակում է, որ մի հատ հայտնագործություն անենք, աշխարհին զարմացնենք, այդպիսի բան չկա»,-ասաց սոցիոլոգը:

Ադիբեկյանի կարծիքով Հայաստանին հարկավոր է գոնե առաջնային 100 -150 հազար աշխատատեղեր, որ կարողանանք գործազրկությունը ու արտագաղթը կանխել, որովհետև  արտագաղթի հիմնական պատճառը գործազրկությունն է կամ ընտանիքների ցածր եկամուտները:

«Իսկ այդ 100 հազար աշխատատեղը ստեղծելու համար մեզ առնվազն պետք է 150 միլիարդ դոլար ներդրում, ով պետք է դա անի  մի երկրում, որը փակուղային  է, տարածքային խնդիրներ ունի, և այլն: Դրա համար ոչ դասական լուծումներ են պետք, որ կարողանանք դուրս գալ այս վիճակից: Եթե կարողանանք գոնե մի քանի խոշոր գործարան կառուցել մարզկենտրոններում, դրանց շուրջը բնակչությունը կարող է իր գլուխը պահել»,-ասաց Ադիբեկյանը:

Սոցիոլոգի խոսքով արտագաղթի ծավալներն ամենից շատը Գյումրիում են, որտեղ էլ աղքատության մակարդակն է բարձր: Իսկ օրինակ` Արմավիրի մարզում, ըստ Ադիբեկյանի, աշխատատեղերի բացման որոշակի աճ է նկատվել, ծնելիությունն է բավականին աճել. նախորդ տարվա համեմատ այս տարի 1500 –ից ավելի երեխա է դպրոց գնացել:

 

Թողնել պատասխան

Ձեր էլ-փոստի հասցեն չի հրապարակվելու։