Ռուս խաղաղապահները դրական դեր են խաղում տարածաշրջանում կայունության և անվտանգության ապահովման, ինչպես նաև Լեռնային Ղարաբաղ հայ բնակչության հնարավոր վերադարձի համար պայմաններ ստեղծելու առումով։ Այս մասին Radio Sputnik-ին տված հարցազրույցում ասել է Հայաստանում Ռուսաստանի դեսպան Սերգեյ Կոպիրկինը։
«Չնայած այն քննադատություններին, որոնք մենք հաճախ ենք լսել և շարունակում ենք լսել մեր խաղաղապահների հասցեին, նրանք իսկապես շատ մեծ, շատ կարևոր դեր են խաղացել հենց այն գործառույթների շրջանակներում, որոնք իրենց փոխանցվել են որպես խաղաղապահ ուժ, ոչ թե օկուպացիոն ուժ, սա չպետք է շփոթել, այլ խաղաղապահ ուժ»,- ասել է Սերգեյ Կոպիրկինը։
«Այս գործողության ընթացքում հազարավոր մարդիկ ապաստան գտան խաղաղապահների ճամբարում՝ խաղաղապահների դիրքերում։ Ստեփանակերտի մերձակայքում տեղի ունեցած այն սարսափելի պայթյունից հետո, երբ բազմաթիվ մարդիկ զոհվեցին, բազմաթիվ մարդիկ վիրավորվեցին, մեր խաղաղապահները շատ կարևոր դեր ունեցան մարդկանց տարհանման գործում։ Մեր ուղղաթիռի օդաչուներն իրականացրել են նաև վիրավորների տեղափոխումը Հայաստանի տարածք, որպեսզի նրանք տեղավորվեն հիվանդանոցներում։ Այսինքն՝ խաղաղապահներն իրոք ամեն ինչ արել են իրենց կողմից՝ խաղաղ բնակչությանն օգնելու համար»,- նշել է նա։
Սերգեյ Կոպիրկինը նշել է նաև, որ ռուս խաղաղապահները դրական դեր են խաղում տարածաշրջանում կայունության և անվտանգության ապահովման, ինչպես նաև Լեռնային Ղարաբաղ հայ բնակչության հնարավոր վերադարձի համար պայմաններ ստեղծելու առումով։
«Ինչ վերաբերում է այժմ կոնկրետ գործառույթներին ու խնդիրներին, կարծում եմ, որ դա ներառում է աջակցություն օրինականության պահպանման, լքված գույքի անձեռնմխելիության և Լեռնային Ղարաբաղի մշակութային և պատմական ժառանգության անվտանգության ապահովման գործում։ Որքան հասկանում եմ, այս թեմաների շուրջ երկխոսություն կա ադրբեջանական կողմի հետ, քանի որ Լեռնային Ղարաբաղը հանդիսանում է Ադրբեջանի տարածքի մաս, ինչպես ճանաչվել է նաև հենց Հայաստանի կողմից»,- ասել է դեսպանը։