Երբ Եվրոպան նայում է Հայաստանին, մենք տեսնում ենք ընկերոջ, բարեկամի, և հույս ունեմ, որ երբ Հայաստանը նայում է դեպի Եվրոպա, դուք ևս տեսնում եք գործընկերոջ և դաշնակցի: Այդ մասին Ստրասբուրգում վարչապետ Նիկոլ Փաշինյանի հետ համատեղ հայտարարության ժամանակ ասաց Եվրոպական խորհրդարանի նախագահ Ռոբերտա Մեցոլան:
Ըստ Եվրախորհրդարանի նախագահի՝ Փաշինյանի առաջնորդությամբ շատ մեծ նվաճումներ են եղել եվրոպական քաղաքական համայնքի նախորդ՝ հոկտեմբերի կոպենհագենյան ժողովից ի վեր, և այս համատեքստում կարևորեց հատկապես ՀՀ-ԵՄ շրջանակում ռազմավարական նոր օրակարգի հաստատումը:
«Այս քայլը մեր հարաբերություններում կաջակցի ժողովրդավարական բարեփոխումներին, կամրապնդի տնտեսական դիմակայունությունը, կամրապնդի իրավունքի գերիշխանությունը և կխորացնի անվտանգության ոլորտում համագործակցությունը:
Մենք նաև ողջունում ենք այն հանգամանքը, որ վիզաների ազատականացման գործողությունների ծրագիր է ներկայացվել:
Այս ամենը նպաստում է տարբեր ոլորտներում մեր համագործակցությունն ամրապնդելու՝ Եվրոպայի ընդհանուր նպատակին, և ես վստահ եմ, որ մեր խորհրդարանները կշարունակեն առաջատար դեր ունենալ ձեր երկիրը մեր Միությանն ավելի մոտ բերելու հարցում»,- ասաց նա:
Ռոբերտա Մեցոլան նաև շնորհակալություն հայտնեց, որ Իրանի իրադարձությունների ֆոնին Հայաստանը մարդասիրական կարևորագույն միջանցք է դարձել. «Շնորհակալ եմ, որ օգնել եք Եվրոպայի քաղաքացիների տարհանման հարցում»:
