Սյունիքի մարզպետ Ռոբերտ Ղուկասյանն օրերս աշխատանքային այցով եղել է շրջակա միջավայրի նախարարության էկոպարեկային ծառայության Սյունիքի մարզային վարչություն՝ տեղում ծանոթանալու ստորաբաժանման աշխատանքներին և ընթացիկ խնդիրներին։
Այս մասին հայտնել է նախարարությունը:
Աշխատանքային այցի ընթացքում մարզպետը բարձր է գնահատել վարչության կողմից իրականացվող աշխատանքները բնապահպանական հսկողության, անտառների ու բնության հատուկ պահպանվող տարածքների պահպանության և համայնքային մակարդակով բնության պահպանության հարցում փոխգործակցության ուղղությամբ։ Հատուկ ընդգծվել է Էկոպարեկային ծառայության կարևոր դերը տարածաշրջանում բնապահպանական անվտանգության ապահովման, անտառային ու բնության հատուկ պահպանվող տարածքների պահպանության գործում։
Շնորհակալություն հայտնելով կատարած արդյունավետ աշխատանքի համար՝ մարզպետը մի շարք աշխատակիցների հանձնել է շնորհակալագրեր, բարձր գնահատելով նրանց մասնագիտական պատասխանատվությունը և ծառայողական նվիրումը։ Էկոպարեկային ծառայության Սյունիքի մարզային վարչության ներկայացուցիչներն, իրենց հերթին, նշել են, որ մարզպետարանի և համայնքապետարանների հետ ձևավորված գործընկերային հարաբերություններն ապահովում են համատեղ աշխատանքի բարձր արդյունավետություն։
Այդ փոխադարձ վստահությունն ու համագործակցությունը կարևոր հիմք են բնապահպանական ծրագրերի կայուն իրականացման և տեղական կառույցների ներգրավվածության ամրապնդման համար։
Այցը ևս մեկ անգամ վկայեց, որ Սյունիքի մարզում պետական կառավարման և բնապահպանական կառույցների համագործակցությունը կառուցողական է, փոխվստահության և պարտավորեցնող վերաբերմունքի վրա հիմնված։ Էկոպարեկային ծառայությունը շարունակելու է հետևողականորեն իրականացնել իր առաքելությունը՝ համատեղ ջանքերով պահպանելով Սյունիքի հարուստ և բազմազան բնությունը։
