Մարտի 3-ին չարտերային չվերթով Մասկատից Երևան է ուղևորվել 115 ուղևոր, որոնց մեծ մասը (90-ից ավելի) ՀՀ քաղաքացիներ են, այդ թվում՝ Հեռավոր Արևելքից Օման եկած 2 քաղաքացի: Այս մասին հայտնեց ՀՀ ԱԳՆ մամուլի քարտուղար Անի Բադալյանը։
«Օմանում ՀՀ դեսպանության անձնակազմը ներկա է եղել օդանավակայանում, քաղաքացիներին ցուցաբերվել է անհրաժեշտ աջակցություն»,-ասաց Անի Բադալյանը։
Հիշեցնենք, որ Երևանում երեկ վայրէջք էր կատարել Օմանից առաջին տարհանման չվերթը։ Fly One Armenia-ի ինքնաթիռը Մասկատից տեղափոխել է ԱՄԷ-ի տարբեր քաղաքներից Օման տեղափոխված քաղաքացիների։
Նշենք, որ ԱՄԷ քաղաքներ զբոսաշրջության նպատակով մեկնած ՀՀ քաղաքացիներն այնտեղ են մնացել փետրվարի 28-ից Իրանի դեմ Իսրայելի, ԱՄՆ-ի հարձակման, այնուհետ ԱՄԷ-ում գտնվող ամերիկյան ենթակառուցվածների ուղղությամբ Իրանի պատասխան հարվածների պատճառով։
Հակամարտության հետևանքով Մերձավոր Արևելքի մի շարք երկրների օդային տարածքներ են փակվել։
Մարտի 3-ին ԱՄԷ-ում ՀՀ դեսպանությունը տեղեկացրել էր նաև մարտի 4-ին՝ երեկոյան ժամը 21:00-ին կայանալիք Մասկատ-Երևան չվերթի ու ԱՄԷ-ից Օման հասնելու անվճար հնարավորության մասին։
