ԱՄՆ նախագահ Դոնալդ Թրամփը չի բացառել ամերիկյան ցամաքային զորքեր Իրան ուղարկելու հնարավորությունը՝ անհրաժեշտության դեպքում ռազմական գործողության նպատակներին հասնելու համար. հայտնում է Time ամսագիրը, հաղորդում է ՌԻԱ նովոստի-ն։
«Թրամփը չի բացառել նման հնարավորությունը։ Նա հայտարարել է, որ, իր կարծիքով, արշավի նպատակները կարող են իրականացվել չորս-հինգ շաբաթվա ընթացքում, թեև ընդունում է, որ ժամկետները կարող են ձգձգվել։ Նրա խոսքով՝ պատերազմը կշարունակվի այնքան ժամանակ, քանի դեռ այդ նպատակները չեն իրականացվել»,- գրում է Time-ը՝ հղում անելով ամսագրին տված հարցազրույցում Թրամփի խոսքերին։
Ինչպես նշում է հրատարակությունը, այն դեպքում, եթե իրանական իշխանությունները պահպանեն վերահսկողությունը իրավիճակի նկատմամբ կամ ճնշեն երկրի ներսում հնարավոր բողոքի ցույցերը, Վաշինգտոնը կարող է բախվել մի որոշման, որից նախկինում փորձում էր խուսափել՝ ուղարկել ցամաքային ուժեր։
Թրամփը միևնույն ժամանակ ընդգծել է, որ գործողության համար ժամանակային սահմանափակումներ չի սահմանում։
«Ես որևէ ժամանակային սահմանափակում չունեմ։ Ես ուզում եմ սա հասցնել ավարտին»,- հավելել է նա։
